Nii, ‘diyo Ibusen ‘ta Kilawen

‘dik ammo no makapakatawa daytoy wenno awan la’ng.

Idi kano ubbing da angkelko a Mario–agtawenda kano ngata ti sangapulo, ti maysa a malem a napanda nagpaarab kadagiti tarakenda a nuang a kaduana dagiti kabaddungalanna a kakasinsinna met laeng, nakakitada ti bayabas a narnuoyan ti bunga–adda a karisabong, apag-isu laeng ti luomna, ken adda metten dagiti sobran ti perroka–sadiay dayaen ti tay-ak a nagpaarabanda. Nagiinnunada kano a napan nagala. Maysa ditoy ni Maning, daydi angkelko a Maning, kunak man ‘ta saanko metten napuotan daytoy a kasinsin daydi inak.

Ket gapu ngata ti ayatda, inasakda lattan a, ti sumpok dagiti marasili.

Ngem iti saan nga agbayag, idi addadan a nakalangkapi iti bukot dagiti nuangda, bigla lattan nga agpaarayat ‘di angkel Maning kano. Maulaw ta maulaw kano lattan ket nagdanagda amin.

Hu! Makaulaw sa met ti bayabas. Isu kano man ti imbagada idi.

Wenno, nam-amlingan ngata, kuna kano ‘tay maysa.

Idi kuan lumitem kano met lattan ‘di angkel Maning.

Nakagataksa ti uleg, dakayo. Inngadalna kano.

Tinaray kano ni angkel Mario daydi apong Anong a tatang ni angkel Maning.

Tang! Tang! Ni Maning, nakagat ti uleg, mataysan! Inyanangsab ni angkel.

Putdek man laengen ket attiddogsa met unay.

Natay ngarud ni angkel Maning. Ket, naimasayag.

Maysa a malem, dua ngata nga aldaw sakbay ti pumpon, nagparte kano da apong Anong ti kalding a pamasidada kadagiti agsangpet a kakabagianmi.

Ti balayda pay laeng idi ket daytay adda pay laeng sirokna. Mabalin a pagiinuman kano pay sadiay sirok. Nakaimasayag daydi angkel Maning iti kadak’lan ti balayda a matannawagan dagiti agbantay ken dagiti umay makipagdung-aw dagiti agiinum no kua sadiay baba, abayen ti agdan.

Gapu ngarud ta adda dagidi nagsangpet a kakabagianda, napan met a nakipatpatang ‘di apong ¬†Anong. Madama met ti ilgat dagiti babbarito ken dadduma a lallakay iti daytay napulpogan a kalding. Naaramidda payen ti killawen ken narugiandan ti sanga-prasko a ginebra.

Nangdung-aw daydi lakay.

Ay, Maning nga anakko aya…adtoy dagiti kakabagiam a sada la ammo ti umay no nataykan…

Dayta kano man ti inyayugna ta nakaprimer kanon idi madama t’ pulpogda.

Urayla kano itudona dagidi kakasinsinna a kasangsangpet iti leddaangna.

‘dika la agbain, gasio! Indil-agkan met daydi apongmi a baket nga asawana.

Naikkat pay ketdin ‘ta tali ‘ta karsonsiliom, sika a laklakayan.

Nagbaningrot kano ‘di lakay ket inwadagna ‘di apong baket. Idi pagam-ammoan ket nataldiapanna dagiti agil-ilgat ti kilawen a kalding. Nasiputanna ti panangrakemda ti natemplaanen a kilawen ket maibus payen ‘di adda iti plato a lata.

Apay Maning, annakko, a…’dim la ket inbagan a natempla met gayamen ‘tay kilawen a…

Ket, tinalliawna kan’ manen ‘di sirok. Nagbaningrot. Nagbuelta a timmallikud iti lungon…

Nii, ‘diyo ibusen ‘ta kilawen!

Sinublina manen ‘di nakamasayag nga anakna.

Maibus met diay kilawenen anakko, ala. Bantayankanto manen a…damdama.

Nagsanapsap kano ket arintarayen a bimmaba ti agdan a bayog. Iti maikapito a tukad ken isu metten ti akinbaba a tukad, naikaglis ket nabanitog ti abay ti papag nga ayan dagiti agkilkilaw.

Nii, ‘diyo ibusen ‘ta kilawen kunak ke’! Inyanikkina kano.

Anian nga ellek kano da angkelko a Mario.

****

Magustoanyo? Ag-subscribe kayo ket maawatyo ti kabarbaro a postek ditoy sadiay emailyo.

No saanyo magustoan, ag-subscribe kayo latta bareng addanto met laeng magustoanyo he he.