Pumaratipit Dagiti Uni ti Saltek


Philippines recovers 1.8bln dlrs from Marcos
-AFP, Wednesday, March 04, 2009
Farmers shaved their heads in protest
-Phil.Star, Wednesday, March 04, 2009

Papanan koma ti kuarta
a naikapuds no di met laeng iti suli
dagiti manglimlimo a bulsa
wenno ti siket dagiti buakaw a supot
a sitatanggaya a nakanganga nga agur-uray
ti matnag a bunga ti inigges a mangga?

Pumaratipit kunak koma dagiti uni ti saltek,
adda arte kunak koma manen,
ngem daanen dagitoy a drama
kaslan kalakay ti panalteek dagiti tungpa
kadagiti parupa ti diario idi sariugma.

Agay-ayat manen dagiti kamalala
ti manglimlimo a bulsa. Adda manen
bilion nga agar-arimasa.
Maiwarsi dagiti baria ta isu ti babantot
ken ti manakliing nga agaweng a murmuray
ti pusa a nagginudo kadagiti bara
ti dalikan a naynay a maulcer ti maisaang a banga.
Dagiti papel ket makunesda a mailakasa
mailukotlukot kadagiti bulsa
ti abungot a penpen ket maigigir
kadagiti ngaretteb dagiti bao nga agsapul ti rutrot
tapno rumuarto a baro ken naalmidor
a pangliwliwa kadagiti mannala ti chacha
kadagiti komedor.

Iti isu met laeng a damag
makalbon dagiti talon a siuungap
a kas met ti panagkalbo dagiti mannalon ti arapaap.
Saan laeng a ti gurong ti maurotan ti buok
pati pay ketdin ti tuktok
gapu iti gaddil nga itden ti rarasa ti nakem
ta uray ti ulo ket saanen a pakawanen dagiti alimatek.
Saanen nga umanay ti panagpungot ti buok.
Magetteng pay ketdin a kas protesta
ket maiwagayway ti panawen a nasalimuot.

Padaananyo ket aglalanglangto manen
dagiti supot nga agtikrab
manipud ti bussog ti pappapel a nalukot.
Mabatinto latta dagiti pusa nga agammusay ti awan.
Ti panalteek ti saltek ket maisaluketto latta
kadagiti bautek wenno kadagiti sallabawan.
Maurotto aminen a buok uray payen urmot
dagiti amma ti arado ken suyod.
Agmuttalengto amin dagitoy kadagiti saludsod
no sadino ti ayannan dagiti nalukot
nga inna dagiti binting.

Maitungpatungpanto manen iti rupa
ti binilbilion a lunod ngem binting met laeng
dagiti manabtuog kadagiti agkupasen a sabot.

About Ka Loren
Siak ni Florentino B. Lorenzana, maysa a Filipino, Ilokano ken Pangasinan. Naiyanakak innem a bulan kalpasan ti deklarasion ti Martial Law ditoy Pilipinas. Madama a makumikom iti tignay kooperatiba.

3 Responses to Pumaratipit Dagiti Uni ti Saltek

  1. Ka Loren says:

    Ka VF:

    Naplaten kunada. Saanen nga agtulid…

    Kuna idi ni Ka Sherma kaniak ket: “kasla kitkitaek ti naynay a nakatag-ay a gemgemmo ken im-imaginek ti ulom a naynay a nakabarabad ti nalabaga a lupot/rigis.”

    Wen, kabsat, aglalaok a rikna iti naibugas saan laengen a naibingas. Kaadduanna kadagiti imbagam. Kayatko amin a makabasa kadagiti sursuratek ket agpungtot; mabalin a saandan a kayat a basaen wenno kalpasanda nga agbasa ket agbasbassawangda met. Ti kayatko koma pay ket inton taliawek manen dagitoy a kinur-it ket kasla saanko kayaten a taliawen.

    Ka Eli:

    Adun dagiti naalada a kuarta manipud iti kunkunada/(tayo?) a tinakaw/natakaw ni Apo Marcos, ngem, ayannan? Napanannan? Siasinon ti nairanud?

    Adu, wen, adu pay a panagsiput Kabsat.

    Kadakayo a dua, agyamanak ti iyaagibasyo manen.

  2. ELIment says:

    nagado man nga kwarta dayta. sapay kuma ta mapan iti dapat nga papanan na ta madi nga mapan idyay bulsa da.

  3. VF says:

    Marikna dagiti naibinggas a naglaok a saning-i KEN apas kadagiti daniwmo KaLoren.

    “Maitungpatungpanto manen iti rupa
    ti binilbilion a lunod ngem binting met laeng
    dagiti manabtuog kadagiti agkupasen a sabot.”

    …mabalin nga apas, mabalin a saning-i, mabalin met nga aglaok ket agbalin a pungtot, ket agbalinto manen nga apas, no di man saning-i.

    ngem ti biag ket saanen a kas ligay nga agtultulid. sinigkatanen dagiti adda iti takem ket kaasi laeng dagiti nabati iti baba.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

%d bloggers like this: