Napnuan Karayo ti Tawen


(kenka Anib Gaius, maikatlo a putot)

Napnuan karayo ti tawen, nakkong.

Sinigseggaandaka dagiti kakam
iti mamingasut nga apros ti saklot
ni inam ken iti maminpulo met laeng a pulo
a paludip iti kona nga agur-uray kenka.
Mailiwda met iti baro a bara ti isbo
ken ti makatitileng nga ibit
ngamin saan met a madagdag ti siam
a bulan a panagestasionmo iti sidong
ti appupo ti agkinni-kinni a patong
ket wen, ammomi nga inanusam ti binigat
ken ti minalem a pannakatagtag iti CRV
a serbis. Ania ngarud ket masapul met ti panagobra
tapno addanto sidadaan nga isudsodmi
no kastan nga agrungaabka. Iti tunggal Sabado
a kaaddak ket idennetko met ti lapayagko
iti tian a pinabussog dagiti darepdep ket katawaak
dagiti kanarpaak ti kugtarmo.
Kalpasanna sukainak a singingiit dagiti sulsuli
ken kirkirak dagiti tapok
iti sipi a pagtarusam.
Kasta met a naynay a baro
a laba ti ap-ap ti dalagan uray ammok
nga ti umuna nga aldaw nga iddaam ket takkiam.
Ay, nasiimmo koma ti langa ni apongmo a baket
a mangbidingbiding kadagiti lampin
nga alos kadagiti kakam.
Nakitam koma dagiti mapirpirpir nga isemna
no kasta nga ipasirna ti nalitemen a katsa
sakbay nga itanebna daytoy iti danum
ti agatklorox a batia.
Addaka koman idi agsasaruno dagiti tanektek
ti saltek ket nasiputam koma ti panangsango ti pusa
ti ridaw sa met laeng agammusay ket idi kuan
addan dagiti appongmo iti Pangasinan.
Tinarapnos dagiti isemda ti panagkilikilmo
iti uneg ti tian ngem gaputa mabayagka pay laeng
a rummuar a kuna ti mammadto
nga ultrasound, tinaliawda met laeng ti dalan
sada kuna: ‘Agawidkami pay nakkong
ket dagiti dengnguenmi ken kasta metten
a mangisaangkami pay ti ugingenmi
tapno addanto manen pagpletemi a sumarungkar.’
Ay, nakitam laeng koma ti paludip kaniak ni inam!
A kas man kunana: ‘Piman pay a nagannak
saan payen a masango ti anak uray laeng
ti apagdarikmat.’ Ania pay, inarikapkon a,
ti ar-arak ti imam. Ket, anian ta idi
agragutkan a rumkuas, naipisok dagiti lupot
iti bag ket nabitbit pati termos!
Nasapsapaka ngem iti aldawmo
iti makadomingo. Sinalemsem pay daytoy barukongko
iti kasaor ti malem nga idilat ti baybay
ngem nabatikami met nga agur-uray ken Eman
(ti agadi kenka) gaputa nagaligusgoskami iti muging,
ti aligusgos a di makaidna
a taeng dagiti di agressat a gubat
kuna dagiti mamati. Malas iti palengke
ngem kunak a suerte ngamin timpuarka
a kas anib ti panagtunged ti tawen.
Kasinginnaka pay ti salemsem.
Sinabetnaka ti rag-o ni Manongmo Hans.
Rinay-awmo ti kabsatmo idi kamatenna
ti stretcher a nangitulod kenka
ti silid a pakakigtotam.
(Awan met ngamin ti bigao a pakaitar-apam!)

Ita, buniaganka iti nagan ti ilokano a balikas,
sika a pinutot ti puli ni Amian
salaknibannaka koma ti birtud
ti angin, Anib Gaius.

Advertisements

About Ka Loren
Siak ni Florentino B. Lorenzana, maysa a Filipino, Ilokano ken Pangasinan. Naiyanakak innem a bulan kalpasan ti deklarasion ti Martial Law ditoy Pilipinas. Madama a makumikom iti tignay kooperatiba.

7 Responses to Napnuan Karayo ti Tawen

  1. Ka Loren says:

    yah, ‘ve been visiting that goodness hermeneutics notes that i kept ’til now.

    sapay koma, wen, apo, sapay koma ta kasta….

  2. aurelioagcaoili says:

    You be, he will. With a father like you, a poet of our people, a poet of our struggle, a poet of our freedom, what more does he ask for, aver? there you go, anib ti daga, daga nga anib. hey, i know how to decipher names, remember? it is a difficult fix with critical heremeneutics, that darn philosophy of the living word, the word that lives, that word that gives life.

  3. Ka Loren says:

    Ka Eli:

    Wen, mayat ti adu nga ubbing, naragsak. Ngem, nasayaat koma no adu met ti gundawayda nga agbiag.

    Maestro:

    Wen, lampin ti mausar sir. ‘wan met ti igatang iti dayta commercialistic status ti pampers. Sapay koma maestro ta ibiagnanto ti naganna ket agbalin nga ari ken anib ti Amian a nakaiyanakanna. Sapay koma…

  4. aurelioagcaoili says:

    ala, aglabakat’ lampin. dika gumatang iti pampers ta saan nga eco-friendly dayta. nasaysayaat ti lampin ta ganagan ti daga ti isbo ken ibleng ti ubing. maysa pay: mariknam ko kua ti kinaamam. ken maysa pay: maestoriamto dayta ken gaius, ti ari ti daga, nga animb met laeng ti daga–anib-daga, an-anib ti daga. what a handsome name, like your poems. congratulations to you both!

  5. ELIment says:

    ka lorenm mayat man. nagmayat nga talaga nu adda iti ubeng.

  6. Ka Loren says:

    Agyamanak manen, Maestro. Komusta kayon?

  7. aurelioagcaoili says:

    Kablaawanka, baro nga ama ti ubing ken baro nga ama ti kapputot a darepdep!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s

%d bloggers like this: