Ti Panagayab ken ti Pannakaayab, manen


Umuna unay ket pagyamanak iti kinanayon nga idadaw-asyo ditoy a blogsite ket dumawatak ti dispensa iti kinaawan ti baro a naiposte a nadanonyo ditoy. Makumikomak ngamin iti adu unay a reports a kasapulan ti pannakaipataray ti branch ti kooperatibami ditoy Agoo, La Union. Madama ti management ken financial audit ti kooperatibatayo appo. Narigat a naragsak ti makigamulo ti Microfinancing. Narigat ngamin adu ti masapul a pigsa ken anus ngem naragsak ngamin adu met ti maital-o a pada met laeng a marigrigat. Adtoy man ti nabayagen a rinugiak a poste maipanggep ti Alumni Homecoming ti seminario a nakalpasak met ti Adal-Pilosopia.

********

‘Papa, yogkan? Yabyu! Naguni ti celfonko. Nagtanettet kunak koma ngem kasdiay met ti unina. ‘Papa, nakaturogkan? Love you!’ a balikas ti message tone ti cpk nga inrecordko idi dua pay laeng ti tawenna ti maikadua a pinutotko. Daytoy ti message tone ti cpk tapno saanko a malipatan dagiti subliak a familiak no kasta nga agkayabkayab datao. Natured ti sairo ngamin mismo a ni Jesukristo ket sinulisogna pay he he he.

Pniselko ti tiklado ti celfonko ket: Mng d sratmo gpu cmilus. Ket sinungbatak: Lktam txtmo knyak. ‘Ifaxko n 2m’ ti naisungbat.

Sal-at. Kastoy ti panagayab itattan. Daytoy ti pakausaran ti reading comprehension, kunanansa itay. English, Readinga a suheto. Maanag ti ti kayat a sawen, maawatan a sumagepsep. Interpretasion, understanding, hermeneutica. Fusion. Agkammayet ti texto ken ti agbasa. Masapul met a maawatan ti padas-biag, padas kunak man laengen ta saan a mapadasan no saan a maibiag, ti nagsurat, ti naisurat ken ti agbasa. Agkakammayet dagitoy tapno adda pannakaawat. Ha-ot ketdi! a kuna daydi Apong Lakay.

Mamatiak.Wen, mamatiak ta kasano koma a maawatak dayta cmilus. Asino daytoy a pilato? Sadino daytoy nga impierno? kunak koma no saanko a napadasan.

Kastoy itan ti pannagayab ken pannakaayab. Adayo la unay iti wagas ti panagayab ni Jesu S. Kristo kadagiti mangngalap iti ikan a nagbalin a mangngalap ti tao.

Ngem, saan met unay nga adayo ti wagas a panagayab nga inusar ti seminario iti panagsubli, manen. Naikoreo iti ala tsamba nga address. Isu met ketdi a ti justo a pagtaengan idi. Idi a. Sangapulo ket lima inggana ti duapulo ket tallo a tawenen ti napalabas. Napnuan ti panamati: Solo Dios Basta!

Malagipko la ket ngarud ti pangngarig ti agpaspastor ken ti karnero a welwel, naiwawa, managdakiwas, addaan hilig ti diskurso, saan a sumurot ti isu a dana, naiyaw-awan. Nagwaywayas. Agsapsapul ti wayawaya. Pinanawan ti pastor dagiti tarakenna ket sinapulna ti naiwawa. Inanusanna a binirok ket idi mabirokanna, anian a ragsak ti pastor a nangitipon ti karnero iti arban! Maysa laeng nga aldaw daytoy. Maysa laeng a panagapon. Nabirokan a dagus ti welwel!

Iti inaramid dagiti papastor ti seminario ket kasla man agtabukol iti karayan. Maisarwag ti tabukol ket main-inut a maguyod. Tsamba no adda maala nga udang. Kasla agsalloy iti nadawel a baybay. Maitaya ti salloy ket tsamba no adda maitapniak a pallugsit. Biblical: many were called but few were chosen. Wenno, many were called but few understood the call. Wenno, many were called but few heeded the call. Hay…

Kastoy man ti wagas ti pannakaayabko. Uray pay no kasta, adda met latta rag-o a magutugot iti nailakasan nga ella a mangammo ti nagbanagan dagiti welwel met a padak.

Ituloykonto…

Advertisements

About Ka Loren
Siak ni Florentino B. Lorenzana, maysa a Filipino, Ilokano ken Pangasinan. Naiyanakak innem a bulan kalpasan ti deklarasion ti Martial Law ditoy Pilipinas. Madama a makumikom iti tignay kooperatiba.

4 Responses to Ti Panagayab ken ti Pannakaayab, manen

  1. efren says:

    pinadas ko lang ti agsearch itoy website maipanggep ti st. camillus college seminary ket nakitak ngarud daytoy blog mo… nagsayaaten ta nagsurat ka ti maipanggep ti panagsasarak tayo nga nakaturpos dita nga pagadalan… urayek ti katuloy na tuy surat mo kabsat…

  2. Wen ngarud Maestro. In-inutek tapno objectivo ti pannakasuratna numanpay saan a maikkat ti panagkomento. Immay ni Ka Igca. Nagpatangkami kadagiti mabalin a pakibinnuligan no kas pangarigan. Kayatna idi a saanak pay agawid daras ta agsarita kami, planning a ngata ngem kunak masapuldak sadiay obrak ta adda pirmaak. Isu, ditoyton a email ti mabalin a pagsisinnukatan ti kapanunotan, Maestro.

  3. Wen ngarud Maestro. In-inutek tapno objectivo ti pannakasuratna numanpay saan a maikkat ti managkomento. Immay ni Ka Igca. Nagpatangkami kadagiti mabalin a pakibinnuligan no kas pangarigan. Kayatna idi a saanak pay agawid daras ta agsarita kami, planning a ngata ngem kunak masapuldak sadiay obrak ta adda pirmaak. Isu, ditoyton a email ti mabalin a pagsisinnukatan ti kapanunotan, Maestro.

  4. ala, detalyeem, ballong, ta makapidut datao iti adal iti panagtataripnongyo manen. immay ni bukidnon boy?

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s

%d bloggers like this: