Ingel ti Basi ti Lumboy


Painumenka kunak ti maestro
dagiti arimpadek ti dangadang. Di agdudua
awan pangadua nga adda lebben a basi
ti lumboy a dara dagiti ranget
ti narra ken batikalang a teddek
ti nakaiyanakan nga Amian.

Mamatiak ken, wen, ammok
ti pudno: awanen dagiti lumboy
ta nagbalindan a tingal ken tekken
naputedputed a kas baratillo a sirmata
nakiinnarakupdan kadagiti maidarusdos a lagip
dagiti nagawan nga imeng ti pakarso
a duayya iti malem ti Amian.

Anian ta ditoy laengen a sirok
ti alipuspos a mapilit ti kurimbara
a mawagwag dagiti kuribetbet
a mapidut dagiti kurriit
a makulog dagiti lumboy iti in-inaka.
Anian ta ditoy laengen a tukot
ti barukong a mapespes dagiti tubbog ti ingel
sa maidulin iti prasko a tawid
sa mayuray iti salemsem ti idadateng.

Adda ket wen, kunak, addanto latta
tumakder a lumboy kadagiti nagpanawan
kadagiti kursada a nagawan
kadagiti turod a nakikakaasi
kadagiti ingel ti baet nagtakkub a pinggan.
Adda ket wen, addanto latta
ti atibuor ti dara ti mutektek
a lumboy a sallukob ti pakarso
a kamang dagiti anito a nagkallautang.

Wen, itinto kalgaw nga agsabat dagiti isip
rumsik met dagiti aningaas ti abrasa.

Aggarakgakto ti basi ket agrennek
a makiinniliw kadagiti anito a dumteng.

Advertisements

About Ka Loren
Siak ni Florentino B. Lorenzana, maysa a Filipino, Ilokano ken Pangasinan. Naiyanakak innem a bulan kalpasan ti deklarasion ti Martial Law ditoy Pilipinas. Madama a makumikom iti tignay kooperatiba.

One Response to Ingel ti Basi ti Lumboy

  1. anian a kinalaing! viva, gerero!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s

%d bloggers like this: