Umaykayo, Ibagak Amin Kadakayo Dagitoy


Damagenyo, ayanan dagiti sabong?
Dagiti pinenpen a papel ti daniw
a nagubbogan ti panagimutektek ti biag?
Dagiti sagumaymay a nagalud-udan ti tudo
a nangsibog kadagiti namnama a naitukit ti baet ti kimat
ken gurruod ken ikkis ti ragsak dagiti billit?

Umaykayo, ibagak amin kadakayo dagitoy.
Umasidegkayo.
Agindegak ti kalapaw a sumango
ti agdaldalluyon a ngayed ti namnama a naibugas
kadagiti ikkis ken rag-o ken pannakapennek
dagiti ubbing iti ay-ayam ti kaputotan
a kinnirit ken pinnuged ken siatong
ken sunay ken sungka.
Hans, malagipmo?
Eman, malagipmo pay
dagiti silo a pakat kadagiti desdes?
Anib, sika, dagiti ngay nabaliktad a bato
ti panagkurimes ken panangsiblokmo kadagiti agatol
a nairagpin kadagiti bulbul-ok?

Adda arte a taginayon a laok dagiti sagibo
kalpasan a ngimmisit amin nga alamen
ti nagparutan ti natinggaw a pan-aw. Adu met
ti naadaw iti panagpamarut dagiti tungkling
ken ti panagarudok dagiti pugo, kumleb, arudok
ala pagpag a kas met laeng panagpinnaltog dagiti bislak.
Makapaisem man met ti lagip iti panagin-iniin ti batya
a naisalog iti sengngat a nakaigelgelan dagiti tekkab
a dagensen dagiti kalman, dagiti aldaw ti panangarrabis
ti tambak.

Pagamuan timpuar dagiti rettab, agngayngayebngeb
iti agum a tawid ti palso a papel. Nagungor
dagiti buldozer a kasingin ti anglem ti M-16.
Nakset dagiti linnaaw ti sagumaymay ti kalapaw
ket nagpaggaak dagiti kullaaw. Naaladan
dagiti pan-aw, nabuak met dagiti tukling ket saan
met a nakapagarudok dagiti pugo. Awan
simngaw nga ikkis wenno gikgik koma laeng.

Sadiay, itudok, ti nakaitugkelan ti banbanti
a kalasag ti mandala nga apon dagiti billit
tuleng ken sadiay ti nagsalaan dagiti tadok
a pinakawan dagiti rakem. Sadiay met
a nabilang dagiti binettek ken siningay. Sadiay
a naisiraman dagiti nairub a diket. Dita
iti saan nga adayo a nasangat dagiti silo
iti abay ti dati a sengngat. Nagin-iniin met
dagiti batya iti dayta a pantok ket nagayus
dagiti kabkab a nagtunged kadaydi burubor
dita. Wen isu daytoy dagiti naibaul a tawidyo
no maburakyo koma dayta nakabite a bangen
ti waya dagiti sirmata ken maabogyo
dagita nakaikuadra nga awto a sukat
dagiti dawa ti namnama. Ket, agsublinto
dagiti sabong ken dagiti daniw a napenpen
a tinakaw ti panawen.

About these ads

About Ka Loren
Siak ni Florentino B. Lorenzana, maysa a Filipino, Ilokano ken Pangasinan. Naiyanakak innem a bulan kalpasan ti deklarasion ti Martial Law ditoy Pilipinas. Madama a makumikom iti tignay kooperatiba.

8 Responses to Umaykayo, Ibagak Amin Kadakayo Dagitoy

  1. Ka Loren says:

    Ka Sherma:

    No lumukay ti sched, kayatna a saw-en, awanen obra he he he. Siak madamaak a ma aud-audit. Sapay laeng koma ta awan naibolsak a kuarta he he he.

    Ka Eli:

    Saanmo a batoken no nauneg. Urayem a rummuar, tumpaw, lumung-aw. Padaanam laeng. Dika agkirem baka lumned met laeng he he he he.

    No adalem, paatianam. Kitaem ket umababaw. Kasla iti kunak ken Ka Nelson, no baliktad a triangle, cotangent, narigat a solbaren, saan? Wayam met a baliktaden ti triangle tapno agbalin a tangent. Di opposite over adjacent laeng ti solution, nalaka?

    Don’t worry to what you can’t do. Do only what you can, that’s it. Bwa ha ha ha ha. ‘senyana birthdayko bukas (feb 26) e.

  2. brainteaser says:

    Payback time? Hehehe. Wen ken saan!

    Kakaisuna ngamin a nakapagtalnaak idi kalman, isu nga inalistuak metten a ti nagdakiwas kadagiti sigud a paspasiarek. Adu pay ti saanko a nadanon, kaloka. :-)

    Ngem kasla lumuklukay ti sched’en gyem! Yey! :-)

  3. eli says:

    naguneg. madik maabot. hehe

  4. brainteaser says:

    Opppppssss! Adda gayam ditoy ni Buddy’k! Heyyo, MCP!

  5. brainteaser says:

    Hayyo gayyem!

    Diak ammo dagiti dadduma a termino, ngem still, magustuak daytoy a daniw.

    Biktimaak sa metten ti panawen, yor! Wenno kinakurang ti ammo?

    I think it’s not too late tapno ipasagepsep dagiti kultural a tawid kadagiti ubbing, gyem. Definitely adun dagiti napukaw, ngem adu latta pay ti nabati a maiyallatiw kadakuada.

  6. Ka Loren says:

    Hey! What’s this? Payback time? Bwa ha ha ha.

    Agyamanak ti anusmo Ka Sherma despite your hectic sched. Keep the fire burning. But, keep it slow.

    Wen, matagiben koma dagitoy a tawid. Agpukawdan, ammok ken mariknak. Sadiay balaymi didiay Pangasinan, awanen dagiti suyod, asway, ken karison. Nasukatanen dagitoy ti tractor.

  7. Ka Loren says:

    Ka VF:

    Agyamanak manen. Karimbuaya? Saankonsa maidasigen daytoy a mula/ruot.

    Inyebkasko man laeng ditoy ti epita dagiti bangkag a nagaponanen dagiti pabrika, a dagiti kamalig ket saanen a binnetek ti mapenpen no saan ketdin a yotse a kunam, ken kadagidi sengngat nga itan ket nagaburanen ta sayang ngarud ti ispasio. Nailangi metten dagiti tukling, sibeg ken pugo, naawanandan ti pagtaengan.

    Metaporikali, kasta met dagiti padak a marigrigat a mapapanaw iti nakaiyanakan a bangkag gaputa tuntonen metten dagiti agtawid ti titulo. Kasla tukling, sibeg, pugo, alamen, mandala ken burubor a main-inuten nga agpukaw ket dumtengto ti panawen a malipatantayon dagiti kultura a tawid.

    Isu, daytoy a daniw ket ipalpalagipko dagitoy kadagiti tallo a pinutotko. Sapay koma ta saan pay a nagabay ti amin ken saan pay amin a natakaw ti mannibrong a panawen…

  8. VF says:

    “mandala, alamen kdpy.” –balbalikas a manmanon a mausar, nakisangen a kas kadagiti sabong a nagawan. Ta pangalaam pay ti alamen no tractor metten ti usaren? Agpukaw ti alamen ket agpukaw met ti mandala, kas panagpukaw dagiti sibeg ken tukling.

    Idi un-unana nga aldaw, darekdek laeng ken karimbuaya ti alad. Ita, gaput’ kinaagum ti tao, sementon a di makaladkad ti pusa tapno saanda a maitaray tay ‘yotseda’.

    Pati sabong ti karimbuaya, awanen. Ta awan metten ti karimbuaya!

    (Ops, agsabong kadi ti karimbuaya itay?)

    Nice Greenpeace piece…
    :-)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Follow

Get every new post delivered to your Inbox.

%d bloggers like this: