Mayo Uno: Agbiag ti Obrero!
Posted by Ka Loren on April 30, 2008
Agobraak no May 1. Kuna ni misisko.
Ania?! No holiday ken aldaw tayo met nga obrero daytoy. Kunak met. Uray daytoy met laengen a ti madayaw a kanito a para kadatayo. Inpakamakamko.
Adu ngarud ti obra. Masapul a maiserrek idiay computer system ken masapul dagiti taga BSP dagitoy reports. Kunana manen.
Na a. No ammom la koma ti saem dagiti agdisso a pang-or ken alinggaget a parnuayen ti tunggal martsa. No mano a tedted ti ling-et ken lua ken dara pay, no isu. Saan met a marukod dagiti rikna ken asug. Dagitoy amin ket isu ti naisalda a kas pangsaka kadagitoy gin-awa a sagsagrapentayo ita, sika ken siak, ni bossmo ken dagita nga BSP staff. Kinunak manen.
Naglua ni misisko. Wen ammok, kinuna. Kinayatka ken inyatka ti kasta a kinataom. Rebeldeka iti amin a banag ngem masapul met a sumurot tayo ti agdama nga sistema.
Maawatak, kinunak. Ngem adipennaka ti kapitalismo inggana iti saanmo a maitured ti agsaan. 364 nga aldaw iti pannakaibalud, 1 nga aldaw laeng ti kinawaya. Maisuko pay…amin, wen, amin. Awan ti bagim!
Kooperatiba ti ayanta. Cooperative bank kaniak. Primary kenka.. kinuna. Kooperatibismo saan a kapitalismo.
Wen, kooperatibismo. Isu ngarud a kunak a masapul a madayaw met koma dagiti mapirit a kanito a para kadatayo.
Agbiagtayo amin nga obrero!
Anonymous said
Ala, dika agpauyo, mannurat. Mailiwkami ngamin kadagiti bumegbeggang a kapampanunotam!. Isu nga ita ta nasudak ti riknam, adu pay koma ti mabasami, uray no saan nga inaldaw, basta adda. Agbiag dagiti padatayo a kumarkarappet ken apo a gasat.
Florentino Lorenzana said
Pakawanendak apo no ti kunayo a panagikayko ket daytoy panagsarimadeng nga agblog. Makumikomak ngamin ti taripnong dagiti grupo ti babbai a napautangantayo ti nayon a puonan. Masapul a mataripato dagitoy ket in-inut a mapabilegda tapno agbaringkuas tayo amin manipud ti gayunggayong ti kinakurapay. Masapul a rumkuas tayo iti pannakaadipen tayo kadagiti agpapautang.
No met ti kinomentaranyo ket daytoy naiblag ditoy ngato. Saanak a pulos nagikay wenno nagsusugel, maysa laengen nga aldaw ti para kadakami nga agkarkaramut ket takawen pay laeng ti panaginkukuna a masapul a malpas daytoy ngamin kasapulan.
Agbiag a kanayon dagiti padak a kumalkalipkip kadagiti bakras tapno agpidut ti ruting tapno makaaramid ti alipato a rumsik!
Anonymous said
Napasamaikmon, ballong? Nia man a rasonen daytoy a panagikay ken panagsugel, a?